دل غلطی کر بیٹھا ہے اب بول خسارہ کیا ہو گا۔ تحریر ابن آدم پسروری

دل غلطی کر بیٹھا ہے ۔۔۔۔ تحریر ابنِ آدم پسروری 2018 کے عام انتخابات میں کامیابی کے بعد پاکستان تحریکِ انصاف کی مرکز اور صوباٸی حکومتیں کوٸی قابلِ ذکر کارکردگی نہ دکھا سکی تھیں اور لوگ مہنگاٸی، کرپشن، لاقانونیت، ترقیاتی کاموں پر پابندی، بلدیاتی اداروں کی عدم فعالیت اور Bad Governance سے پریشان تھے۔ پی ٹی آٸی کی مقبولیت تیزی سے کم ہو رہی تھی۔ اگر حکومت کو مدت پوری کرنے دی جاتی تو پی ٹی آٸی یادِ ماضی بن جاتی مگر لندن میں بیٹھے باٶ جی اور پاکستان میں ان کی صاحبزادی کی جلد باز طبیعت اور مولانا کی اسمبلی سے دوری کے غم نے اپوزیشن اتحاد قاٸم کردیا اور پی ڈی ایم کے نام

سے پی پی پی اور کچھ علاقاٸی پارٹیوں کو ساتھ لے کر اسلام آباد کو فتح کرنے چل پڑے۔ اور چودھری پرویز الٰہی کے بقول عدم اعتماد کی ہنڈیا چولہے پر چڑھا دی گٸی۔ اسی دوران میں غفلت میں پڑا ہوا شیر عمران خان اچانک جاگ اٹھا۔ اس نے پلٹ کر وار کردیا۔ بجلی اور پٹرول کی قیمتیں کم کردیں اور سیاسی شہید بن کر اور مظلومیت کا لبادہ پہن کر جلسے شروع کردیٸے کہ حکومت کو پانچ سال پورے کرنے نہیں دیٸے جا رہے۔ اگر مجھے ہٹایا گیا تو کرپٹ ٹولہ پھر برسراقتدار آ جاٸے گا۔ پاکستان کے سادہ لوح عوام نے مظلوم وزیراعظم پر محبت اور عقیدت کے پھول دوبارہ نچھاور کرنا شروع کردیٸے۔ عمران خان اپنی 26 سالہ سیاسی جدوجہد کی بلندیوں کو چھونے لگا ہے۔ ایک ماہ پہلے تک جو عورتیں مہنگاٸی کا رونا روتے ہوٸے عمران خان کو بد دعاٸیں دیتی تھیں وہ اب کہتی ہیں کہ بے چارے عمران خان کو وزیر اعظم کے عہدے سے ہٹانا غلط بات ہے، اس کو مدت پوری کرنی چاہیے۔ اسے اچھی ٹیم نہیں ملی لیکن وہ خود ایماندار ہے۔ اپوزیشن والے اس صورتحال سے پریشان ہیں۔ اب کوٸی لانگ مارچ یا عدم اعتماد عمران خان کا کچھ نہیں بگاڑ سکے گا۔ وہ زیادہ اکثریت کے ساتھ واپس آ جاٸے گا۔ ہمارا مشورہ ہے کہ اب اپوزیشن رہنماٶں کو یہ قوالی سننی چاہیے ۔۔۔ دل غلطی کر بیٹھا ہے اب بول خسارہ کیا ہو گا۔