ملک بھر میں گیس کا بحران شدت اختیار کر گیا

 

 پنجاب سمیت ملک بھر میں بجلی اور گیس کا بحران شدت اختیار کر گیا ، شہری اور دیہی علاقوں میں گیس اور بجلی کی بد ترین لوڈ شیڈنگ کی وجہ سے معمولات زندگی بری طرح متاثر ہو رہے ہیں۔بتایا گیا ہے کہ ملک بھر میں گیس کا بحران شدت اختیار کر گیا،پریشر میں کمی کی وجہ سے گھروں کے چولہے ٹھنڈے ہو گئے،شہریوں کو گھروں میں کھانا پکانا بھی ناممکن ہو گیا۔ملک بھر میں گیس کا بحران شدید تر ہو گیا ہے۔متعدد علاقے طویل گیس کی لوڈ شیڈنگ کی زد میں ہیں۔ذرائع کے مطابق آر ایل این جی کارگو نہ آنے سے سسٹم میں گیس کی کمی ہو گئی جس سے لاہور سمیت پنجاب بھر میں گیس کا پریشر کم ہو گیا۔لاہور کے اکثر علاقوں میں صارفین گیس سے محروم ہیں اور پاور سیکٹر کو بھی گیس کی فراہمی کم کر دی گئی۔

ذرائع کا کہنا ہے کہ سسٹم میں گیس کی 500 ملین کیوبک فٹ سے زائد کمی کا سامنا ہے۔سوئی ناردرن حکام کا کہنا ہے کہ کارگو جلد پورٹ پر پہنچ جائیں گے، اگلے ہفتے صورتحال نارمل ہو جائے گی۔سوئی ناردرن حکام کے مطابق کھاڈ اور ٹیکسٹائل سیکٹر کو بھی گیس کی فراہمی کم کر دی گئی۔سسٹم میں گیس آنے سے پریشر بہتر ہو جائے گا۔وفاقی دارالحکومت اسلام آباد اور جڑواں شہر راولپنڈی میں بھی صورتحال انتہائی خراب ہے۔لاہور کے متعدد علاقوں میں گیس کے کم پریشر نے شہریوں کی زندگی اجیرن بنا رکھی ہے۔سمن آباد ، اندرون شہر ،گلشن راوی اور اقبال ٹاؤن سمیت کئی علاقوں میں شہریوں کو گیس کی لوڈ شیڈنگ کا سامنا ہے۔ملتان میں گیس کی لوڈشیڈنگ اور کم پریشر کے باعث گھریلو صارفین پریشان ہیں۔۔ مختلف علاقوں میں گیس کی بندش اور پریشر میں کمی نے خواتین اور بچوں کوبھی احتجاج کرنے پر مجبور کر دیا ہے۔ بیشتر علاقوں میں گیس پریشر میں کمی کے باعث لوگوں کو روزہ مرہ معاملات زندگی میں دشواری کا سامنا ہے